ᑲᒪᒋᔭᖃᓯᓂᖅ ᐊᑯᓂᐊᓗᒃ ᑭᖕᖒᒪᒋᔭᐅᔪᑐᖃᕐᒥᒃ
ᓄᓇᕕᐅᑉ ᐃᓄᑐᐃᓐᓇᖏᑦ ᐅᖃᐅᖃᓱᑐᖃᐅᕗᑦ ᖃᐅᔨᓴᕐᓃᑦ ᓄᓇᕕᒻᒥ ᐱᕙᓪᓕᖁᑎᐅᖃᑦᑕᑐᑦᓴᐅᒋᐊᖏᑦ ᖃᓄᐃᖕᖏᓯᐊᕐᓂᓴᓄᑦ, ᖃᐅᔨᒪᔭᐅᔪᓂᓪᓗ ᐱᐅᓯᒋᐊᕆᓂᕐᓄᑦ, ᐊᒻᒪᓗ ᐃᓅᑦᔪᓯᑎᒍᓪᓗ, ᐱᓂᐊᕐᓂᓕᕆᓂᑎᒍᓪᓗ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᖏᑎᒍᑦ ᓄᓇᕕᒻᒥᐅᑦ, ᑭᓯᐊᓂ ᑕᒪᓐᓇ ᐱᐅᓯᕆᔭᐅᖏᓐᓇᓱᖑᖏᑐᖅ. ᑲᓇᑕᒥᐅᑦ ᐃᓄᑐᐃᓐᓀᑦ ᐱᓇᓱᒍᑎᖏᑦ ᖃᐅᔨᓴᕐᓂᓂᒃ ᐅᖃᐅᓯᖃᕈᑎᐅᓲᑐᖃᐅᕗᑦ ᖃᐅᔨᓴᕐᓂᒥᒃ ᐱᓇᓱᒍᑎᐅᔪᑦ ᐃᓄᑐᐃᓐᓀᑦ ᓄᓇᖏᓐᓂ, ᐃᓄᑐᐃᓐᓀᑦ ᐊᓂᕐᕋᖃᕐᕕᖏᓐᓂ ᑲᓇᑕᒥ, ᐱᓇᓱᑦᑕᐅᒍᓯᖃᓗᐊᖕᖑᐊᓱᖑᒋᐊᖓ ᐃᓚᐅᑎᑦᓯᓂᕐᑕᖃᕋᓂ ᐊᒻᒪᓗ ᓲᕐᓗ ᖃᓪᓗᓈᖕᖑᑎᑦᓯᓂᕐᑕᖃᕋᓱᓐᓂᐅᓱᓂ – ᐃᓄᑐᐃᓐᓀᑦ ᖃᐅᔨᒪᔭᑐᖃᖏᓪᓗ ᓄᓇᓯᒪᕕᖏᓪᓗ ᐊᑐᕐᑕᐅᕙᑦᑎᓗᒋᑦ ᐊᓯᖔᓄᑦ ᖃᑭᒍᑎᐅᑦᓱᑎᒃ. ᐊᓯᑦᔨᑎᕆᓃᑦ ᖃᐅᔨᓴᕐᓂᐅᑉ ᐊᐅᓚᑕᐅᒍᓯᖏᓐᓂᒃ ᐱᑕᖃᓪᓚᕆᒋᐊᖃᕐᑐᑦ ᑭᖕᖒᒪᓇᕐᓱᑎᒃᓗ ᑌᒣᓕᕈᑎᒃ ᐃᓄᑐᐃᓐᓀᑦ ᓇᒻᒥᓂᖅ-ᑐᑭᑖᕐᑐᐃᒍᓐᓇᐅᑎᖏᓐᓂᒃ ᐊᑐᖃᑦᑕᓕᕋᔭᕐᒪᑕ ᑐᑭᑖᕆᒋᐊᖃᓕᕈᑎᒃ ᖃᐅᓴᕐᓂᓂᒃ ᐃᓚᐅᑎᑦᓯᔪᓂᒃ ᐃᓄᑐᐃᓐᓀᑦ ᓄᓇᓕᖏᓐᓂ, ᓄᓇᖓᑕ ᓂᕐᔪᑎᖏᓐᓂᒃ ᐊᒻᒪᓗ ᓄᓇᖓᑕ ᐊᕙᑎᖓᓂᒃ.
ᒫᓐᓇᐅᑎᓪᓗᒍ, ᓄᓇᕕᒃ ᐃᓄᑐᐃᓐᓀᑦ ᓄᓇᖏᓐᓂ ᑖᓐᓇᑐᐊᖑᓕᕐᒪᑦ ᐱᑕᖃᕋᓂ ᐊᑕᐅᓯᕐᒥᒃ ᐊᐅᓚᑦᓯᓂᕐᒥᒃ ᐱᓇᓱᒍᑎᓂᒃ ᐅᕝᕙᓗᓐᓃᑦ ᖃᓄᐃᓘᕈᑎᓕᐊᖑᒪᔪᓂᒃ ᐃᓕᖓᑦᓱᑎᒃ ᕿᒥᕐᕈᓂᕐᓄᑦ, ᐊᖏᕐᓂᓄᑦ ᐊᒻᒪᓗ ᑲᒪᓇᓱᑦᑕᖃᕐᓂᓄᑦ ᖃᐅᔨᓴᕐᓂᒥᒃ ᐱᓇᓱᒍᑎᓂᒃ. ᖃᐅᔨᓴᕐᓂᒥᒃ ᐊᐅᓚᑦᓯᒍᑏᑦ ᓄᓇᕕᒻᒥ ᐃᓚᑯᒻᒪᕆᐅᒻᒪᑕ ᐊᒻᒪᓗ ᐱᒃᑲᕋᓱᒋᐊᓕᐹᓗᑦᓱᑎᒃ. ᐃᓚᖏᑦ ᐱᓇᓱᒐᖃᕐᕖᑦ ᓄᓇᕕᒻᒥ ᐱᔭᑦᓴᖁᑎᖃᕐᑎᑕᐅᔪᑦ ᖃᐅᔨᓴᕐᓂᓂᒃ ᑲᒪᒋᔭᖃᕐᓂᒥᒃ, ᑭᓯᐊᓂ ᑕᒪᒃᑯᐊ ᐱᔭᑦᓴᖁᑎᖃᕐᑎᓯᒍᑏᑦ ᐊᓐᓂᑭᑦᑐᒥᒃ ᐱᔭᐅᒐᓱᓐᓂᖃᓲᑦ ᐱᑦᔪᑎᖃᕐᓱᑎᒃ ᓱᓇᒨᓕᖓᓪᓗᑯᕐᓂᒥᓂᒃ ᐊᒻᒪᓗ ᓄᓇᑕᖏᑦ ᑐᑭᑖᕐᑕᐅᒪᓂᑯᖏᓐᓄᑦ ᐱᓇᓱᒐᖃᕐᕕᐅᔪᑦ ᑎᓕᔭᐅᒪᒍᑎᖏᓐᓂᒃ ᑐᖕᖓᕕᖃᕐᓱᑎᒃ. ᐊᑕᐅᑦᓯᑯᖃᑕᐅᒻᒥᒪᑕ, ᐊᒥᓱᖕᖑᐸᓪᓕᐊᓂᖏᑦ ᓇᓗᓀᕐᑕᐅᒪᔪᑦ ᐱᓂᐊᕐᓂᓕᕆᓃᑦ, ᐊᕙᑎᓕᕆᓃᑦ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᓃᑦ ᐱᒻᒪᕆᐅᒋᐊᖏᑦ ᐅᑭᐅᕐᑕᑐᒥ ᑌᒣᑦᓱᓂ ᐊᒥᓱᖕᖑᑐᐹᓗᓯᒪᓕᕐᑐᑦ ᖃᐅᔨᓴᕐᓂᐅᕙᑦᑐᑦ ᓄᓇᕕᒻᒥ ᑕᒪᓐᓇᓗ ᐊᒥᓱᖕᖑᓯᒪᓂᖅ ᐊᕐᕌᒍᕐᓂ ᐊᓂᒍᕐᖃᒥᕐᓂ ᐊᑑᑎᔭᐅᕙᓕᕐᓱᓂ, ᓄᓇᓕᓐᓄᓗ ᐱᓇᓱᒐᖃᕐᕕᓄᓪᓗ ᐅᖁᒣᑦᑐᓕᕐᓱᓂᐊᓪᓛᑦ. ᑮᓇᐅᔭᒐᓴᕐᔪᐊᑦ ᒥᓕᐋᓐᓃᑦᑐᑦ ᑮᓇᐅᔭᕐᑐᕈᑕᐅᓯᒪᓕᕐᑐᑦ ᓄᓇᕕᒻᒥ ᖃᐅᔨᓴᕆᐊᕐᑐᓄᑦ, ᑭᓯᐊᓂ ᐱᕙᓪᓕᖁᑎᑕᖏᑦ ᑕᒪᒃᑯᐊ ᐊᖏᔪᒥᒃ ᖃᐅᔨᓴᕐᓂᓂᒃ ᐱᓂᐊᕐᓂᐅᔪᑦ ᓄᓇᖁᑎᑦᑎᓄᑦ ᐱᕙᓪᓕᖁᑎᐅᓚᐅᕐᓯᒪᖕᖏᑐᑦ. ᓄᓇᕕᒻᒥᐅᑦ ᐃᓱᐃᓪᓕᐅᕈᑎᖃᒻᒪᕆᓕᕐᑐᑦ ᖃᐅᔨᓴᕐᑐᓄᑦ ᖃᐅᔨᔭᐅᔪᑦ ᓄᓇᕕᒻᒧᑦ ᐅᑎᓚᐅᕐᓯᒪᖕᖏᒪᑕ, ᑐᑭᑖᕐᓂᓂᒃ-ᐱᓇᓱᑦᑕᖃᕐᓂᒥᒃ ᑭᖑᕙᕐᑎᓯᕙᑦᓱᑎᒃ. ᐊᖏᔪᒥᒃ ᓄᓇᖁᑎᓕᒫᒧᓕᖓᔪᒥᒃ ᖃᐅᔨᓴᕐᓂᓂᒃ ᑕᖃᒋᔭᖃᓕᕐᑐᑦ ᓄᓇᓖᑦ, ᐊᒥᓱᐊᓗᓐᓂᓗ ᖃᐅᔨᓴᕋᑦᓴᓂᒃ ᓄᓇᖁᑎᑦᑎᓄᑦ ᐱᒻᒪᕆᐅᓂᓕᓐᓂᒃ ᑲᒪᓱᓱᖑᖕᖏᒪᑕ ᓯᓚᑎᑦᑎᓂᑦ ᐱᑦᓱᑎᒃ ᖃᐅᔨᓴᕐᓂᒥᒃ ᐱᓇᓱᒐᑦᓴᖁᑎᖃᓲᑦ.
ᐊᑕᐅᑦᓯᑯᓪᓗ, ᐱᑕᖕᖏᓗᐊᕐᓂᖏᑦ ᐊᑕᐅᑦᓯᑯᕐᑎᑕᐅᒪᔪᑦ ᐃᓕᖓᑦᓱᑎᒃ ᖃᐅᔨᓴᕐᓂᐅᒍᒪᔪᑦ ᐊᖏᕐᑕᐅᒋᐊᖃᕐᓂᖏᓐᓄᑦ ᓄᓇᖁᑕᐅᔪᒥ ᑐᑭᖃᕐᒥᓱᑎᒃ ᖃᐅᔨᓴᕐᑎᑦ ᐱᔭᕆᐊᖃᕐᑎᓗᒋᑦ ᐃᓕᒃᑯᓗᑎᒃ ᐃᖏᕐᕋᑎᑦᓯᓂᖃᕐᓂᒥᒃ ᐱᓪᓗᑯᒋᐊᓕᓐᓂᒃ ᐊᖓᔪᕐᖃᐅᔪᑎᒍᑦ ᓄᓇᒥ ᐱᓇᓱᓪᓗᑎᒃ ᑐᑭᓕᐅᕐᓯᒪᑦᓯᐊᑐᓂᒃ ᐱᓇᓱᒍᑎᑦᓴᖃᕋᑎᒃ ᓱᕐᖁᐃᑐᒥᒃ ᓄᓇᓕᓕᒫᓄᓪᓗ ᓄᓇᓕᓐᓄᓗ ᓴᐳᑦᔭᐅᒪᒋᐊᖃᕐᓂᑯᓪᓗ ᐊᖏᕐᑕᐅᒪᒋᐊᖃᕐᓂᖏᑎᒍᓪᓗ ᐱᓇᓱᑦᑕᖏᑕ.
ᓄᓇᕕᒻᒥᐅᑦ ᑐᑭᑖᕐᓯᒪᓕᕐᖁᑦ ᓄᑖᒥᒃ, ᓯᕗᓕᕐᑕᐅᔪᒥᒃ-ᓄᓇᕕᒻᒥᐅᓄᑦ ᖃᐅᔨᓴᕐᓂᒥᒃ ᐊᐅᓚᑦᓯᕕᐅᕙᓐᓂᐊᑐᒥᒃ ᐱᓇᓱᒐᖃᕐᕕᑖᕆᐊᖃᓕᕆᐊᒥᒃ ᑭᖕᖒᒪᑦᓯᒐᒥᒃ ᐱᔭᑦᓴᕈᕐᐸᑐᓂᒃ ᑲᒪᒍᑎᑦᓴᒥᓂᒃ ᐊᒻᒪᓗ ᓄᓇᕕᒻᒥᐅᑦ ᑲᔪᓯᑎᑦᓯᒍᑎᑦᓴᖏᓐᓂᒃ ᐱᔪᓐᓇᐅᑎᒥᓐᓂᒃ ᐊᑐᓕᕐᑎᓯᒍᑎᐅᓂᐊᕐᑐᒥᒃ ᓲᕐᓗ ᓯᕗᓕᕐᑎᐅᓗᑎᒃ ᖃᐅᔨᓴᕐᓂᓄᑦ, ᖃᐅᔨᓴᕐᑕᐅᓂᖃᑐᐃᓐᓇᖔᕈᓐᓀᓗᑎᒃ
ᑕᒪᓐᓇ ᐊᕐᕌᒍᓂ ᐅᓄᕐᑐᓂ ᑭᖕᖒᒪᓇᕐᑐᑐᖃᐅᔪᖅ, ᐊᒻᒪᓗ ᖃᐅᔨᓴᕐᓂᓂᒃ ᐱᓇᓱᑉᐸᑐᑦ ᐅᓄᕐᓯᓯᒪᓂᖏᑦ ᓄᓇᕕᒻᒥ ᐊᐅᓚᑦᔦᓂᖃᕐᓯᒪᓕᕐᖁᑦ ᐱᓇᓱᒐᖃᕐᕕᖁᑎᖏᓐᓂᒃ ᑎᒍᓯᒋᐊᒃᑲᓂᕈᒪᓂᕐᑕᓱᒋᑦ ᓯᕗᓕᕐᓂᒥᒃ ᖃᐅᔨᓴᕐᓂᐅᑉ ᐊᐅᓚᑕᐅᒍᑎᖏᓐᓂᒃ. ᐊᑕᐅᑦᓯᑯᓪᓗ ᑲᕙᒪᐅᔪᓂᒃ, ᐱᓇᓱᒐᖃᕐᕕᓂᓪᓗ, ᐊᒻᒪᓗ ᖃᐅᔨᓴᕐᑎᓂᒃ ᐱᒻᒪᕆᐅᓂᖃᕆᐊᖏᑦ ᓯᕗᒧᐊᑦᑎᓯᓂᖃᕐᑐᓴᐅᒋᐊᒥᒃ ᑲᑎᖃᑎᖃᕆᐊᑦᓯᐊᑐᑦᓴᐅᓂᕐᒥᒃ ᐊᑯᕐᖓᒥᓐᓂ ᓄᓇᓕᑐᖃᐅᔪᓪᓗ ᓄᓇᓕᑐᖃᐅᖕᖏᑐᓪᓗ ᑐᑭᓯᒪᓂᖏᑦ ᐊᓯᑦᔨᓯᒪᓕᕐᓱᑎᒃ, ᐊᒻᒪᓗ ᑭᖕᒍᒪᓇᕐᓱᓂ ᓇᓗᓀᕐᓯᒋᐊᖃᕐᓂᓗ ᑲᔪᓯᑎᑦᓯᒋᐊᖃᕐᓂᓗ ᓄᓇᓕᑐᙯᑦ ᐱᔪᓐᓇᐅᑎᖏᓐᓂᒃ ᐃᓱᒪᒥᒍᓐᓇᓂᒃᑯᑦ, ᓯᕗᓂᐊᒍᓪᓗ ᐊᒻᒪᓗ ᑐᑭᓯᒪᑦᓯᐊᓗᑎᒃ ᐊᖏᖃᑦᑕᕈᒪᓂᒃᑯᑦ, ᐃᓚᐅᑎᓪᓗᒋᑦ ᐃᓕᖓᒧᑦ ᖃᐅᔨᓴᕐᓂᓄᑦ, ᓴᕐᕿᑎᑕᐅᒪᕗᖅ ᐊᑦᔨᖃᖕᖏᑐᖅ ᐱᒐᓱᕝᕕᓴᐅᓕᕐᑐᑦ ᑕᒪᒃᑯᓂᖓ ᐃᓂᓪᓚᑕᐅᒪᒌᕐᑐᓂᒃ ᐊᓯᑦᔨᑐᕐᓗᒋᑦ ᐊᐅᓚᑦᔦᒋᐊᕐᓂᖃᕐᓂᖅ.
ᐱᓇᓱᑦᑕᐅᔪᓂᒃ ᓯᕗᓕᕐᑐᑦ
ᓄᓇᓕᓕᒫᓄᓕᖓᔪᑦ ᐱᓇᓱᒐᖃᕐᕖᑦ ᓄᓇᕕᒻᒥ ᐊᑑᑎᔭᖃᕆᐊᓯᓚᐅᕐᓯᒪᕗᑦ ᑲᑐᑦᔮᖃᕐᓗᑎᒃ ᐱᓇᓱᐊᕐᓂᐊᓕᕐᓱᑎᒃ ᑌᑦᓱᒪᓂ 2020-ᖑᑎᓪᓗᒍ ᐃᓂᓪᓓᒍᑎᖃᓱᑎᒃ ᑲᑎᖕᖓᔨᐅᒍᑎᖃᕐᓂᐊᑐᓂᒃ ᑕᓯᐅᕐᓯᔪᑦᓴᐅᓗᑎᒃ ᓴᕐᕿᑎᑕᐅᓇᓱᓐᓂᖓᓂᒃ ᑖᑦᓱᒪ ᓄᑖᖑᑦᓱᓂ ᐱᓇᓱᒐᕐᕕᐅᓚᖓᓕᕐᑑᑉ. ᑲᑎᖕᖓᔨᖁᑎᑕᖏᑦ ᑭᒡᒐᑐᕐᑎᒋᔭᐅᔪᑦ ᓯᑕᒪᐅᔪᖕᖏᒐᕐᑐᓂᑦ ᐱᓇᓱᒐᖃᕐᕕᓂᑦ ᐱᓯᒪᑦᓱᑎᒃ ᓄᓇᓕᓕᒫᑦ ᐱᓇᓱᒐᖃᕐᕕᖁᑎᖏᓐᓂᑦ ᐅᑯᓇᖕᖓᑦ – ᒪᑭᕝᕕᒃ (ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᒪᓇᓱᒍᑎᒥᑕ ᐱᓇᓱᒐᖃᕐᕕᖁᑎᖓ), ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ, ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ, ᑲᑎᕕᒃ ᐃᓕᓴᕐᓂᓕᕆᓂᖅ, ᑲᑎᕕᒃ ᓄᓇᓕᓕᒫᑦ ᐃᒡᓗᓕᕆᔨᕐᔪᐊᑯᑦ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ, ᐊᒻᒪᓗ ᐊᕙᑕᖅ ᐱᐅᓯᑐᖃᓕᕆᕕᒃ – ᐃᓚᐅᒻᒥᑎᓪᓗᒍ ᐃᓄᑐᐃᓐᓀᑦ ᖃᐅᔨᓴᕐᓂᓄᑦ ᐊᔪᖀᒋᐊᕐᑎᖓ ᓄᓇᕕᒻᒥ. ᒪᑭᕝᕕᒃ ᐱᑕᖃᕐᑎᓯᒍᑎᓕᒃ ᐸᐸᑕᐅᕕᖓᓂᒃ. ᑲᑎᖕᖓᔨᓕᐊᖑᓯᒪᔪᑦ ᓴᐳᑦᔭᐅᒪᕙᑦᑐᑦ ᐸᐸᑦᓯᕕᒻᒧᑦ, ᖃᐅᔨᒋᐊᕐᕕᓄᑦ ᐊᒻᓗ ᐱᒋᐊᕐᕕᓕᐅᑎᑎᑕᐅᓂᖓᓄᑦ ᑐᑭᒧᐊᑦᑎᓯᔨᒧᑦ.
ᐱᕙᓪᓕᐊᑎᑦᓯᒍᑎᖃᕐᓂᖅ ᐸᕐᓇᑕᐅᓯᒪᔪᓂᒃ ᐊᑐᕐᑐᓄᑦ ᓄᓇᕕᒻᒥ-ᓴᓇᔭᐅᓯᒪᔪᓂᒃ ᐱᓇᓱᒍᑎᓂᒃ
2020-ᒥᑦ ᑎᑭᑦᓱᒍ 2021 ᐊᕐᕌᒍᖓ, ᑲᑎᖕᖓᔨᓕᐊᖑᓯᒪᔪᑦ ᑲᒪᒋᔭᖃᓚᐅᔪᕗᑦ ᓄᐃᑕᐅᒐᓱᓐᓂᖏᓐᓂ ᐸᕐᓇᓯᒪᒍᑎᓕᐊᖑᓯᒪᔪᑦ, ᐃᓚᐅᑎᓪᓗᒋᑦ ᐃᖏᕐᕋᑎᑕᐅᒍᑎᑦᓴᖏᑦ, ᑮᓇᐅᔭᕐᑐᕈᑎᑦᓴᖏᑦ ᐊᒻᒪᓗ ᐊᖓᔪᕐᖃᐅᕕᖃᕐᓂᓅᓕᖓᔪᑦ ᕿᒥᕐᕈᔭᐅᓂᖃᕐᑎᓗᒋᑦ ᑖᑦᓱᒪ ᐱᓇᓱᒐᖃᕐᕕᑕᕐᖃᒥᐅᓚᖓᔫᑉ ᐃᖏᕐᕋᑎᑕᐅᒍᑎᒋᓚᖓᔭᖏᑦ. ᐸᕐᓇᕈᑎᐅᓯᒪᔪᑦ ᓄᐃᑕᐅᓯᒪᒻᒪᑕ ᐅᑎᕐᑕᑕᐅᓗᑎᒃ ᓯᕗᓕᕐᑕᐅᓂᖃᕐᓂᐊᓱᑎᒃ ᑲᑎᖕᖓᔨᓕᐊᖑᓯᒪᔪᓄᑦ ᐊᒻᒪᓗ ᑐᖕᖓᕕᖃᕐᓗᑎᒃ 70 ᐅᖓᑖᓂᑦᑐᓂᒃ ᐃᓄᓐᓂᒃ ᐊᐱᕐᓱᕈᑎᕕᓂᕐᓂᒃ. ᐸᕐᓇᕈᑕᐅᔪᑦ ᑐᓂᔭᐅᒪᒻᒪᑕ ᐃᑲᔪᕐᓯᔭᐅᑦᓱᑎᒃ ᑕᐅᑐᕐᖁᕈᑎᓄᑦ, ᐃᓱᒪᑖᖑᖃᑦᑕᑐᓄᑦ ᓄᓇᕕᐅᑉ ᓄᓇᖓᓂᑦ ᐊᒻᒪᓗ ᓄᓇᓖᑦ ᐱᓇᓱᒐᖃᕐᕕᖏᓐᓂᑦ ᐃᓄᓐᓂᓗ ᓄᓇᕕᒻᒥ ᓯᕗᓕᕐᓂᒥᒃ ᐱᔭᖃᕋᓱᓲᓂᑦ. ᐃᓕᓯᒪᔪᓪᓗ ᐊᒻᒪᓗ ᑲᕙᒪᒃᑯᑦ ᖃᐅᔨᓴᕐᑎᖏᑦ, ᑲᕙᒪᐅᔪᓪᓗ ᐱᔪᓐᓇᐅᑎᑖᕐᑎᓯᓂᕐᒥᒃ ᐱᔪᓐᓇᓂᓕᖏᑦ, ᐊᓯᖏᓪᓗ ᐃᓄᑐᐃᓐᓀᑦ ᓄᓇᖓᓐᓂ ᖃᐅᔨᓴᕐᓂᓂᒃ ᑲᒪᒋᔭᖃᕐᓂᓂᒃ ᐱᓇᓱᒍᑎᖃᕐᐸᑐᑦ ᐃᓚᐅᑎᑕᐅᓚᐅᔪᒋᕗᑦ ᑐᑭᓯᒋᐊᓪᓛᓂᕐᓄᑦ ᐊᒻᒪᓗ ᐊᒥᕐᖄᕈᑎᖃᕐᓱᑎᒃ ᖃᐅᔨᒪᔭᒥᓐᓂᒃ ᖃᓄᐃᓘᕐᑕᐅᒍᓯᖃᓱᖑᒻᒪᖔᑕ ᖃᐅᔨᓴᕐᓃᑦ ᐊᒻᒪᓗ ᐃᓕᑦᓯᒍᑎᕕᓂᐅᔪᑦ. ᖃᓄᐃᓕᖓᓂᐅᓕᕐᑐᓂᒃ ᑐᑭᓯᓂᐊᕐᓂᐅᓯᒪᔪᑦ ᐊᓪᓚᓯᒪᔪᖕᖑᑕᐅᒪᔪᑦ ᐊᕐᕌᒍᓂ ᐊᓂᒍᕐᓯᒪᓕᕐᑐᓂ ᐅᓪᓗᒥᐅᓕᕐᑐᓗ ᖃᐅᔨᓴᕐᓂᐅᓯᒪᔪᓪᓗ ᖃᐅᔨᓴᕐᓂᐅᔪᓪᓗ ᓄᓇᕕᒻᒥ ᖃᓄᐃᓕᖓᓂᖏᓐᓂᒃ, ᐊᒻᒪᓗ ᑲᔪᓯᑎᑦᓯᓂᑦᓴᓄᑦ ᐸᕐᓇᕈᑎᐅᓯᒪᔪᓂᒃ ᐃᓂᓪᓓᒍᑎᑦᓴᐅᓱᑎᒃ ᓄᑖᒥᒃ ᐱᓇᓱᒐᖃᕐᕕᒥᒃ, ᑖᒃᑯᐊ ᓄᐃᑕᐅᓂᖃᕐᓯᒪᒻᒥᔪᑦ.
ᐸᕐᓇᕈᑎᓕᐊᑦ ᕕᕗᐊᕆ 2022-ᒥ ᐊᖏᕐᑕᐅᓚᐅᔪᕗᑦ ᑲᑎᖕᖓᔨᓕᐊᖑᓯᒪᔪᓄᑦ. ᔫᓂ 2022-ᒥ ᐱᒋᐊᕐᕕᖃᕐᓗᑎᒃ, ᐃᓕᑕᕆᔭᐅᓂᓕᓐᓂᒃ ᐊᖏᕈᑎᐅᔪᑦ ᐅᕝᕙᓘᓐᓃᑦ ᑲᔪᓯᑎᑦᓯᒍᑎᐅᔪᑦ ᐱᔭᐅᓚᐅᔪᕗᑦ ᒪᑭᕝᕕᒥᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ, ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥᑦ, ᑲᑎᕕᒃ ᐃᓕᓴᕐᓂᓕᕆᓂᕐᒥᑦ, ᑲᑎᕕᒃ ᓄᓇᓕᓕᒫᒃ ᐃᒡᓗᓕᕆᔨᕐᔪᐊᑯᓐᓂᑦ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓂᑦ, ᐊᕙᑕᖅ ᐱᐅᓯᑐᖃᓕᕆᕕᒻᒥᑦ, ᓄᓇᕕᐅᑉ ᑕᕆᐅᖁᑎᖓᑕ ᓱᕐᕋᑕᐅᓂᑦᓴᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᓐᓂᑦ, ᓄᓇᕕᐅᑉ ᑕᕆᐅᖓᓄᑦ ᐸᕐᓀᑏᑦ ᑲᑎᒪᔨᖏᓐᓂᑦ, ᓄᓇᓕᓕᒫᓂ ᓄᓇᕕᒻᒥ ᐆᒪᔪᓕᕆᔩᑦ ᑲᑐᑦᔨᖃᑎᒌᕝᕕᖓᓂᑦ ᐊᒻᒪᓗ ᖃᕐᔪᐃᑦ ᐅᕕᒃᑫᑦ ᑲᑎᒪᔨᖏᓐᓂᑦ ᐊᒻᒪᓗ ᐊᓯᖏᑦ ᐱᓇᓱᒐᖃᕐᕕᐅᔪᑦ ᐊᖏᕐᓯᒪᒍᑎᑦᓴᓂᒃ ᐱᓇᓱᓚᐅᔪᒋᕗᑦ.