ᔫᓂ 21, 2022
ᓄᓇᕕᒻᒥᐅᓄᑦ ᐊᒻᒪᓗ ᓄᓇᕕᒻᒥ ᖃᐅᔨᓴᕐᓂᓂᒃ ᐱᓇᓱᖃᑎᓄᑦ,
ᐱᔪᕆᒪᐅᑎᖃᕐᓱᑕᓗ ᖁᕕᐊᓱᐊᒍᑎᖃᕐᓱᑕᓗ ᐃᓕᑦᓯᓄᑦ ᑐᓂᔨᕗᒍᑦ ᐸᕐᓇᕈᑎᐅᓯᒪᔪᓂᒃ ᓄᐃᑦᓯᒍᑎᑦᓴᐅᓱᑎᒃ ᓄᑖᒥ ᓄᓇᕕᒻᒥᐅᓄᑦ-ᓯᕗᓕᕐᑕᐅᔪᒥᒃ ᖃᐅᔨᓴᕐᓂᓂᒃ ᐊᐅᓚᑦᓯᕕᐅᓗᓂ ᐱᓇᓱᒐᖃᕐᕕᒥᒃ.
ᓄᑖᖑᑦᓱᓂ ᖃᐅᔨᓴᕐᓂᓂᒃ ᑲᒪᒋᔭᖃᕐᓂᓄᑦ ᐱᓇᓱᒐᖃᕐᕕᐅᑉ ᓴᕐᕿᑎᑕᐅᓂᖓ ᑭᐅᑦᔪᑎᐅᓕᕐᐳᖅ ᐱᑕᖃᓪᓚᕆᒋᐊᖃᕐᓱᓂ ᑭᖕᖒᒪᓇᕐᑐᓄᑦ. ᐊᕐᕌᒍᕐᓂ ᐅᓄᕐᑐᓂ, ᓄᓇᕕᐅᑉ ᐱᓇᓱᒐᖃᕐᕕᖏᓪᓗ ᓄᓇᓕᖏᓪᓗ ᐅᖁᒣᓪᓕᐅᓚᕿᖃᑦᑕᓯᒪᓕᕐᖁᑦ ᖃᓄᐃᓘᕋᓱᒍᑎᒥᒍᑦ ᖃᐅᔨᓴᕐᓂᓂᒃ ᐱᓇᓱᒍᑎᓕᐊᖑᕙᑦᑐᓂᒃ ᐱᓗᐊᕐᑐᒥᒃ ᓄᓇᖁᑎᒥᑕ ᓯᓚᑖᓂᑦ ᐱᔪᓄᑦ, ᐊᑕᐅᑦᓯᑯᑦ ᖃᖏᓐᓈᑕᐅᑎᑦᓯᑌᓕᒐᓱᖏᓐᓇᒥᑦᓱᑎᒃ ᑭᖕᖒᒪᑦᓯᒍᑎᖏᓐᓂᓗ ᐅᓇᒻᓱᒍᑎᖏᓐᓂᓗ ᓄᓇᕕᒻᒥᐅᑦ ᑕᒪᒃᑯᐊ ᐱᓇᓱᑦᑕᐅᓂᖃᕐᓂᓕᒫᖏᓐᓂ. ᑌᒪᓕ ᐱᔭᐅᒐᓱᑉᐸᑲᓗᐊᕐᑎᓗᒍ ᓄᓇᓕᓕᒫᑎᒍᓪᓗ ᓄᓇᓕᑦᑎᒍᓪᓗ ᑲᔪᓯᑎᑕᐅᓂᖃᕋᓱᑦᓱᓂ ᐱᓇᓱᑦᑕᐅᓂᖏᑦ, ᐱᔭᕐᓃᑐᒻᒪᕆᐊᓘᕙᑉᐳᑦ, ᐱᓗᐊᕐᑐᒥ ᐱᑦᔪᑎᖃᕐᓱᑎᒃ ᐊᒥᓱᒻᒪᕆᐊᓗᓐᓂᒃ ᖃᐅᔨᓴᕐᓂᓂᒃ ᐱᓇᓱᑦᑕᐅᔪᖃᕐᓯᒪᑎᓪᓗᒍ ᓄᓇᖁᑎᐅᔪᒥ ᐃᓚᖃᕐᒥᓱᑎᒃ ᑐᑭᓯᒃᑲᕋᓱᒋᐊᓕᓐᓂᒃ ᐊᐅᓚᑦᓯᒍᑎᓕᐊᖑᒪᑦᓱᑎᒃ ᐋᕐᕿᑕᐅᒪᔪᓂᒃ.
ᑕᒪᒃᑯᐊ ᑲᒪᒋᒋᐊᕐᓗᒋᑦ, ᐱᕈᕐᐸᓕᐊᑎᑦᓯᓂᖃᕐᓂᐊᑎᓪᓗᒍᓗ ᐱᑕᖃᕇᕐᑐᓂᒃ ᐱᓇᓱᒍᑎᓂᒃ ᐊᖓᔪᕐᖃᐅᕕᓕᓐᓂᓗ, ᓄᑖᒥ ᐱᓇᓱᒐᖃᕐᕕᐅᕙᓐᓂᐊᓕᕐᑐᒥᒃ ᓴᕐᕿᑎᑕᐅᓇᓱᑦᑐᖃᓕᕐᐳᑦ ᐊᕐᖁᑎᒋᔭᐅᕙᓚᖓᔪᒥᒃ ᓄᓇᕕᒻᒥᐅᑦ ᐱᓇᓱᒐᖃᕐᕕᖁᑎᖏᓐᓄᑦ ᓄᓇᓕᖏᓐᓄᓗ ᐱᐅᓯᒋᐊᕆᒍᑎᐅᓗᓂ ᑐᑭᓯᒪᐅᑎᖃᑎᒌᒍᑎᓂᒃ ᐊᒻᒪᓗ ᐃᓚᐅᕙᓪᓕᐊᓂᖅ ᑲᔪᓯᓂᖃᑦᓯᐊᖁᓪᓗᒍ ᐊᑕᐅᓯᐅᓕᖓᔪᒥᒃ ᖃᐅᔨᓴᕐᓂᓂᒃ ᑲᒪᔨᖃᕐᓗᓂᓗ ᐊᐅᓚᑦᓯᔨᖃᕐᓗᓂᓘᕐᑐᒥᒃ, ᐊᐅᓚᑕᐅᓂᖃᕐᓗᓂ ᐃᓄᑐᐃᓐᓇᓄᑦ, ᐃᓕᖓᓗᓂ ᐃᓄᑐᐃᓐᓇᓄᑦ.
ᖃᐅᔨᓴᕐᓂᖅ ᐱᓇᓱᒍᑎᐅᒍᓐᓇᒪᑦ ᐱᓇᓱᒍᑎᐅᕙᑦᑐᓴᐅᑦᓱᓂᓗ ᓄᓇᕕᐅᑉ ᐃᓄᑐᐃᓐᓇᖏᓐᓄᑦ ᐱᐅᓯᒋᐊᕆᒍᑎᐅᓗᓂ ᐃᓅᑦᔪᓯᓂᒃ ᐊᒻᒪᓗ ᐃᓚᒋᔭᐅᓪᓚᕆᒋᐊᖃᕐᓱᓂ ᓇᒻᒥᓂᖅ-ᑐᑭᑖᕐᑐᐃᔨᐅᓂᑦᓴᓄᑦ. ᓄᑖᖑᓗᓂ ᖃᐅᔨᓴᕐᓂᓂᒃ ᑲᒪᒋᔭᖃᕐᕕᐅᓗᓂ ᐱᓇᓱᒐᖃᕐᕕᐅᓚᐅᖓᔪᖅ, ᐃᓄᑐᐃᓐᓇᓄᑦ ᐱᒍᓐᓇᕈᑎᐅᓛᕐᖁᖅ ᐃᒻᒥᓂᕿᒍᑎᖃᕐᓂᓴᐅᒍᓐᓇᓂᖏᓐᓄᑦ ᐱᔪᓐᓇᐅᑎᖃᕐᓗᑎᒃ ᓇᒻᒥᓂᖅ ᓴᖑᐊᑦᓯᔨᐅᑎᒃ ᖃᐅᔨᓴᕈᑎᓂᒃ, ᐱᐅᓯᖃᖓᕈᓐᓀᓗᑎᒃ ᖃᐅᔨᓴᕐᑕᐅᓂᕐᖃᕐᓂᒥᓂᒃ. ᑕᒪᓐᓇ ᑐᑭᖃᓚᖓᔪᖅ ᖃᐅᔨᓴᕐᓂᒥᒃ ᐱᔭᑦᓴᖁᑎᐅᔪᑦ ᐊᑕᖏᕐᓯᓗᑎᒃ ᓄᐃᑲᑎᑦᓯᓯᐊᕐᓂᐊᑎᓪᓗᒋᑦ ᓄᓇᓖᑦ ᓯᕗᓪᓕᐅᔭᐅᖁᔭᖏᓐᓂᒃ ᑭᖕᖒᒪᑦᓯᒍᑎᖏᓐᓂᓗ; ᖃᐅᔨᓴᕐᓂᓂᒃ ᐱᓇᓱᑦᑕᐅᔪᓂ ᐃᓄᑐᐃᓐᓀᑦ ᐃᓪᓕᕆᔭᖏᑦ ᐃᓚᐅᑎᑕᐅᓂᖃᑦᓯᐊᑎᓪᓗᒋᑦ; ᐊᒻᒪᓗ ᖃᐅᔨᓴᕐᓂᑎᒍᑦ ᑐᑭᓯᔭᐅᔪᑦ ᐊᑐᕐᑕᐅᓯᓗᑎᒃ ᓄᓇᖁᑕᐅᔪᒥ ᐊᖏᔪᒥᒃ ᐱᐅᔪᒥ ᓱᕐᕃᓂᖃᓚᖓᑎᓪᓗᒋᑦ ᓄᓇᕕᒻᒥᐅᑦ ᐃᓅᓯᖏᓐᓂᒃ.
ᐸᕐᓇᕈᑎᐅᓯᒪᔪᑦ ᑖᒃᑯᓄᖓ ᐃᓚᒋᔭᐅᔪᑦ, ᑐᑭᓯᒪᑎᑕᐅᓂᖃᕐᓱᓂ ᐱᓇᓱᑦᑎᓯᒍᑎᐅᖃᑦᑕᑐᕕᓂᕐᓄᑦ ᓄᓇᕕᒻᒥ, ᑐᖕᖓᕕᑦᓴᐅᓚᖓᕗᖅ ᖁᕝᕙᐸᓪᓕᐊᓂᓕᓐᓂᒃ ᐱᓇᓱᒍᑎᓕᐊᖑᓚᖓᔪᓄᑦ ᐃᓚᐅᕕᒋᓂᐊᕐᑕᖏᓐᓄᑦ ᓄᓇᕕᐅᑉ ᓄᓇᓕᖏᑕ ᐃᓚᐅᕕᖃᓪᓚᕆᓪᓗᑎᒃ ᐃᓗᕐᖁᓯᐅᑉ ᑭᓪᓕᐊᒎᕐᑐᓂᒃ ᖃᐅᔨᓴᕐᓂᓂᒃ ᕿᒥᕐᕈᔭᖃᕐᓂᓂᒃ, ᐊᖏᕐᑕᐅᓂᖏᓐᓂᓗ ᐊᒻᒪᓗ ᑲᒪᓇᓱᑦᑕᐅᓂᖏᓐᓂᒃ. ᐱᑦᔪᑎᒋᓗᒋᑦ ᐃᓄᑐᐃᓐᓀᑦ ᑕᑯᓐᓇᑕᖏᑦ, ᐃᑉᐱᓂᐊᕈᑎᖃᕐᖏᓪᓗ ᐊᒻᒪᓗ ᐊᑑᑎᔭᖃᕐᐸᓂᒃᑯᑦ ᓄᓇᑦᑕ ᐊᕙᑎᖓᓂᒃ ᖃᐅᔨᒪᑦᓯᐊᓱᑎᒃ ᑲᔪᓯᑎᑦᓯᓂᖃᕐᓗᑎᒃᓗ ᐊᑕᐅᓯᐅᓕᖓᔪᒥᒃ ᐱᓇᓱᖃᑎᒌᒍᑎᖃᕐᓂᓂᒃ ᐱᒋᐊᖕᖓᓂᖓᓂᑦ ᐃᓱᐊᓄᑦ ᖃᐅᔨᓴᕐᓂᐅᔪᑦ. ᓄᓇᓕᓐᓂᒃ ᐱᔪᓐᓇᓂᕐᑕᑎᑦᓯᓂᖃᕐᓗᓂ ᕿᒥᕐᕈᓂᐅᓕᕐᑐᑎᒍᑦ ᐊᒻᒪᓗ ᖃᐅᔨᓴᕐᓂᒥᒃ ᐱᓇᓱᓪᓗᑎᒃ, ᑌᒣᓕᖓᔪᒥᒃ ᐊᑑᑎᔭᖃᓕᕈᑦᑕ ᐅᑉᐱᕈᓱᑉᐳᒍᑦ ᖃᐅᔨᓴᕐᓂᓂᒃ ᐳᕿᐊᒋᔭᖃᕈᓐᓂᒋᐊᓪᓚᓂᕐᑕᕋᔭᕆᐊᒥᒃ ᓱᓕᔪᕐᓴᓂᕐᑕᓗᕆᐊᓪᓚᓗᓂ. ᐅᖃᕆᐊᓪᓚᐳᒍᓗ ᑖᒃᑯᐊ ᑲᔪᓯᑎᑕᐅᓕᕐᑐᑦ ᐱᕙᓪᓕᕈᑎᐅᓛᕆᐊᖏᑦ ᖃᐅᔨᓴᕐᓂᓄᑦ ᓱᕐᖁᐃᑐᒥᒃ ᐃᓄᑐᐃᓐᓀᑦ ᖃᐅᔨᒪᔭᑐᖃᖏᑦ ᐃᓚᐅᑎᑕᐅᕙᓐᓂᐊᓕᕐᑎᓗᒋᑦ ᐸᕐᓇᕈᑎᓕᐅᓕᕐᑐᓄᑦ, ᑲᔪᓯᑎᑦᓯᓂᖃᓯᔪᓄᑦ ᐊᒻᒪᓗ ᑐᑭᓯᓂᐊᕐᑐᓄᑦ ᖃᐅᔨᓴᕐᓂᓴᒥᒃ, ᐊᒻᒪᓗ ᖃᐅᔨᓴᕐᓂᐅᓚᖓᔪᑦ ᓄᓇᑦᑕ ᐊᕙᑖᓂᒃ ᑐᑭᓯᒪᔭᐅᒌᕐᑐᓂᒃ ᑐᖕᖓᕕᖃᕐᐸᓂᐊᕐᑎᓗᒋᑦ ᓯᕗᓂᖃᖏᓐᓇᓗᑎᒃ ᑐᑭᓯᔭᐅᓯᒪᖕᖏᑐᓂᒃ ᑐᑭᓯᓂᐊᕐᓂᖃᕐᓂᒥᒃ.
ᓴᐱᖕᖏᑐᒻᒪᕆᐅᑦᓱᑕ ᐊᑑᑎᒍᒪᔭᑦᑎᓂᒃ ᒪᓂᔨᒍᑎᖃᓕᕐᐳᒍᑦ, ᐱᑕᖃᓪᓚᕆᒋᐊᖃᓕᕐᓱᓂᓘᕐᒪᑦ ᐅᓪᓗᒥᐅᓕᕐᑐᖅ ᑲᔪᓯᓂᖃᕈᓐᓇᖏᑦᑐᓂᒃ ᖃᐅᔨᓴᕐᓂᓂᒃ ᐱᓇᓱᒍᑎᖃᕐᒪᑦ, ᓴᐳᑦᔭᐅᒪᔪᒥᒃ ᐊᑕᖏᕐᑐᓄᑦ ᓱᓕᓂᖃᑦᓯᐊᑐᓄᓪᓗ ᐸᕐᓇᕈᑎᓄᑦ ᐊᒻᒪᓗ ᐊᑦᑕᓇᖕᖏᑐᑦᓱᑎᒃ ᓄᑭᖃᑦᓯᐊᓱᑎᒃ ᐃᕐᐸᓯᒪᑦᓯᐊᓱᑎᒃᓗ ᓄᓇᕕᒻᒥᐅᓄᑦ ᑲᔪᓯᑎᑦᓯᒍᓐᓇᐅᑎᑖᑎᑕᐅᒍᑎᓄᑦ. ᑖᒃᑯᐊ ᓴᐳᑦᔭᐅᒪᒋᐊᖃᓚᖓᔪᑦ ᐃᓘᓐᓇᓯᐊᖏᓐᓄᑦ ᖃᐅᔨᓴᕐᓂᓂᒃ ᐱᔭᑦᓴᖁᑎᖃᓲᓄᑦ ᑖᓐᓇ ᓄᑖᖑᓗᓂ ᖃᐅᔨᓴᕐᓂᓂᒃ ᑲᒪᒋᔭᖃᕐᑎᐅᓂᕐᒥᒃ ᐱᓇᓱᒐᐅᒍᑎᓕᒃ ᐱᒍᓐᓇᓯᑦᓯᐊᓛᖁᓪᓗᒍ ᐊᑦᑕᓀᑐᓯᐊᕈᕐᓗᓂ, ᐃᓱᐃᓪᓕᔪᖃᖕᖏᓂᖓᓂᓗ ᑲᒪᒋᐊᕈᓐᓇᑐᒥᒃ ᑲᔪᓯᓂᖃᑦᓯᐊᕈᓐᓇᑐᒥᓪᓗ ᐱᓇᓱᒐᖃᕐᕕᒥᒃ ᑕᐅᑐᕐᖂᕈᑦᔭᐅᒪᑕ ᓄᓇᕕᒻᒥᐅᑦ, ᐅᑭᐅᕐᑕᑑᑉ ᐊᕙᑎᖓ ᓱᑲᑦᑐᒥᒃ ᐊᓯᑦᔨᕙᓪᓕᓂᐊᓂᖃᓕᕐᑎᓗᒍ, ᐅᓪᓗᒥ ᑭᖕᒍᒪᓇᕆᐊᓪᓚᓕᕐᑐᖅ ᓄᓇᕕᒻᒧᑦ ᐃᓕᖓᔪᖅ ᖃᐅᔨᓴᕐᓂᓂᒃ ᐊᐅᓚᑦᓯᕕᒃ.
ᑭᒡᒐᑐᕐᓱᑕ ᐱᓇᓱᒐᖃᕐᕕᒥᒃ ᐊᖓᔪᕐᖃᐅᕕᑦᑎᓂᒃ, ᐃᑲᔪᕐᓯᓯᒪᔪᓕᒫᓂᒃ ᓇᑯᕐᒦᕈᒪᕗᒍᑦ ᑖᒃᑯᓂᖓ ᐸᕐᓇᕈᑎᓕᐊᖑᒪᔪᓂᒃ ᓴᐳᑦᔨᓯᒪᓂᑦᓯᓄᓪᓕ ᑖᒃᑯᓂᖓ ᐱᓇᓱᒍᑎᓂᒃ.
ᐊᖏᕐᑕᐅᔪᑦ ᑲᑎᖕᖓᔨᓕᐊᖑᓯᒪᔪᑦ ᐱᓇᓱᒐᖃᕐᕕᖏᓐᓄᑦ:
ᓴᐳᑦᔨᓯᒪᖃᑎᐅᑦᓱᑎᒃ ᐊᖏᖃᑕᐅᒻᒥᔪᑦ:
