ᕕᕈᐊᕆ 13, 2023 – ᐋᑐᒑ, ᐊᓐᑎᐅᔨᐅ
ᐊᑕᓐᓂᐅᕕᒃ, ᓄᓇᕕᐅᑉ ᓄᑖᖑᑦᓱᓂ ᖃᐅᔨᓴᕐᓂᓂᒃ ᐊᐅᓚᑦᓯᓂᓕᕆᒍᑎᖃᕐᓂᓄᑦ ᐱᓇᓱᒐᖃᕐᕕᖁᑎᖓ, ᑐᓂᔭᐅᓯᒪᕗᖅ $500,000-ᓂᒃ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᖑᓲᓂᒃ. ᑕᒪᓐᓇ ᐅᖃᐅᓯᕆᔭᐅᓚᐅᕐᑐᖅ 11-ᖑᒍᑎᒋᓕᕐᑕᖓᓂ ᐊᕐᕌᒍᑕᒫᑦ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᖑᓲᓂᒃ ᓇᓪᓕᐅᓂᕐᓯᐅᕈᑎᖃᕐᑎᓗᒋᑦ ᐋᑐᒑᒥ, ᐃᓚᒋᔭᐅᑦᓱᑎᒃ ᑕᕐᕋᒥᑦ ᐊᕐᓴᓃᑦ ᓂᐅᕕᐊᑦᓴᓂᒃ ᑕᑯᑦᓴᐅᑎᑦᓯᕕᖓᓂᒃ ᑲᑎᖕᖓᓂᕐᔪᐊᖃᕈᑎᖃᕐᑎᓗᒋᑦ.
ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᖑᓲᑦ ᐊᖏᓂᕐᐹᒍᑦᓱᑎᒃ ᑲᓇᑕᒥ ᐊᕐᕌᒍᑕᒫᑦ ᓴᓚᖃᐅᑎᑕᖑᓲᖑᕗᖅ. ᑲᔪᖏᕐᓭᓂᖃᕐᓱᓂ, ᐱᔪᓐᓇᕈᑎᐅᑦᓱᓂ ᐊᒻᒪᓗ ᖁᕕᐊᓱᐊᒍᑎᐅᑦᓱᓂ ᐱᔭᖃᕐᓂᖏᓐᓄᑦ ᑕᕐᕋᐅᑉ ᐃᓄᖏᑕ, ᓇᓗᓀᕆᒍᑎᐅᑦᓱᓂ ᐊᒥᓱᐃᓂᒃ ᐊᑦᔨᒌᑦᑎᖏᑦᑐᓂᒃ ᐱᓇᓱᖃᑎᒌᒍᑎᖃᕐᓕᑐᑦ ᐃᓱᒪᑦᓴᓯᐅᕈᑎᒋᑦᓯᐊᓯᒪᔭᒥᓂᒃ ᐱᓇᓱᒍᑎᖏᓐᓂᒃ.
“ᐊᑕᓐᓂᐅᕕᒃ” ᑐᑭᖃᕐᐳᖅ ᐃᓄᒃᑎᑐᑦ ‘ᐱᔭᖃᕋᓱᕝᕕᐅᓂᕐᒥᒃ ᐊᖏᕐᑕᐅᒍᑎᓂᒃ’. ᐊᑕᓐᓂᐅᕕᒃ ᓄᑖᖑᕗᖅ ᓴᓇᔭᐅᓯᒪᑦᓱᓂ ᓄᓇᕕᒻᒥ ᖃᐅᔨᓴᕐᓂᓂᒃ ᐊᐅᓚᑦᓯᓂᕐᒥᒃ ᐱᓇᓱᒐᖃᕐᕕᐅᓚᖓᑦᓱᓂ ᐃᓂᓪᓚᑕᐅᕙᓪᓕᐊᓱᓂᓗ ᓄᓇᕕᐅᑉ ᐱᓇᓱᒐᖃᕐᕕᖁᑎᖏᓐᓄᑦ. ᓱᕐᖁᐃᑐᒥᒃ ᓯᕗᓕᕐᓯᖃᑦᑕᓚᖓᑦᓱᓂ ᐊᒻᒪᓗ ᐊᖓᔪᕐᖃᐅᕕᖃᕐᓗᓂᒃ ᖃᐅᕕᓴᕐᓂᓂᒃ ᓄᓇᑦᑎᓂ, ᐱᐅᓯᒋᐊᕆᓗᓂᓗ ᐱᕙᓪᓕᖁᑎᑖᖑᓲᓂᒃ ᖃᐅᔨᓴᕐᓂᓂᑦ ᓄᓇᕕᒻᒥ.
ᑖᓐᓇ ᐱᕙᓪᓕᐊᑎᑦᓯᒍᑎᑕᖑᔪᖅ ᑭᐅᑦᔪᑎᐅᕗᖅ ᐱᑕᖃᓪᓚᕆᒋᐊᖃᕐᓱᓂ ᑭᖕᖒᒪᒋᔭᐅᔪᒥᒃ ᓄᓇᕕᒻᒥ, ᑕᒐᑕᒐ ᓄᓇᕕᒃ ᓄᓇᖁᑎᐅᑦᓱᓂ ᐃᓄᑐᐃᓐᓀᑦ ᓄᓇᖏᓐᓂ ᐱᑕᖃᖕᖏᑐᑐᐊᖑᒻᒪᑦ ᓄᓇᕕᓕᒫᒧᓕᖓᔪᒥᒃ ᖃᐅᔨᓴᕐᓂᓂᒃ ᐊᖏᕐᑕᐅᒍᑎᑕᕋᓱᑦᑐᑦ ᐱᓇᓱᑦᑕᐅᒍᑎᖏᓐᓂᒃ. ᐊᑕᐅᑦᓯᑯᕐᑎᓯᔨᖃᖕᖏᓗᐊᕐᓂᒧᑦ ᐊᒻᒪᓗ ᐃᑉᐱᒋᔨᖃᑦᓯᐊᖏᓗᐊᒧ ᐱᓗᐊᕐᑐᒥ ᐊᒥᓱᖕᖑᕙᓪᓕᐊᑐᐃᓐᓇᑎᓪᓗᒋᑦ ᖃᐅᔨᓴᕐᓂᓂᒃ ᐱᓂᐊᕐᓂᖃᕐᐸᑐᑦ ᐅᖁᒣᑦᑐᖃᑦᑕᓕᕐᒪᑕ ᓄᓇᓕᓐᓄᓗ ᐱᓇᓱᒐᖃᕐᕕᖁᑎᐅᔪᓄᓪᓗ. ᐊᑕᓐᓂᐅᕕᒃ ᓱᕐᖁᐃᑐᒥᒃ ᓄᓇᕕᐅᑉ ᐃᓄᑐᐃᓐᓇᖏᓐᓂᒃ ᓯᕗᓕᕐᑎᓯᖃᑦᑕᓛᕐᖁᖅ ᖃᐅᔨᓴᕐᑕᐅᓂᖃᓕᕐᐸᑕ ᐃᓄᖁᑎᕗᑦ, ᓄᓇᕗᑦ ᐊᒻᒪᓗ ᐃᒪᖁᑎᕗᑦ, ᑌᒣᓘᕐᓗᓂ ᖃᐅᔨᒪᔭᐅᔪᑦ ᐱᕙᓪᓕᖁᑎᓕᐊᖑᓂᕐᓴᐅᖃᑦᑕᓛᓕᕐᒪᑕ ᓄᓇᕕᒻᒥᐅᑦ ᐃᓅᑦᔪᓯᖏᓐᓄᑦ.
ᐊᑕᓐᓂᐅᕕᐅᑉ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᕋᓱᓐᓂᒥᒃ ᐱᓇᓱᒍᑎᒋᓚᐅᔪᔭᖏᑦ, ᓄᓇᕕᒻᒥ ᐱᓇᓱᑦᑎᓴᓂᒃ ᐊᒥᓱᖕᖑᐃᒐᓱᓐᓂᖅ ᐃᓕᖓᔪᓂᒃ ᓇᒻᒥᓂᖅ-ᑐᑭᑖᕆᖃᑦᑕᓂᑦᓴᒧᑦ ᖃᐅᔨᓴᕐᓂᓂᒃ, ᓯᕗᓂᖃᕈᑎᒋᕙᖓᑦ ᐃᓄᓐᓂᒃ ᐱᓇᓱᑦᑐᓴᓂᒃ ᐊᒥᓱᖕᖑᐃᕙᓪᓕᐊᒐᓱᓐᓂᒥᒃ ᐊᑕᓐᓂᐅᕕᐅᑉ ᐱᓇᓱᑦᑕᒥᒍᑦ ᐃᖏᕐᕋᑎᑕᖏᓐᓂ. ᓱᕐᖁᐃᑐᒥᒃ ᐊᑕᓐᓂᐅᕕᒃ ᐃᖏᕐᕋᑎᑕᐅᖁᓪᓗᒍ ᐃᓄᑐᐃᓐᓇᓄᑦ ᐃᓄᑐᐃᓐᓇᓅᓕᖓᓗᓂᓗ, ᑖᑦᓱᒪ ᐱᓇᓱᒍᑎᖏᑦ ᓯᕗᓂᖃᕈᑎᐅᓚᖓᔪᑦ: ᐱᓇᓱᑦᑎᑖᕐᓂᓴᓂᒃ, ᐱᒋᐅᕐᓴᑎᑦᓯᓂᑦᓴᓂᒃ, ᐊᒻᒪᓗ ᐊᐅᓚᑦᔦᓂᕐᒥᒃ ᐱᓇᓱᑦᑎᓂᒃ; ᐃᓂᓪᓓᓂᖃᕐᓗᓂ ᐊᒻᒪᓗ ᐱᒋᐅᕐᓴᑎᑦᓯᓗᓂ ᓄᓇᓕᓐᓂᓗ ᓄᓇᓕᓕᒫᓂᓪᓗ ᐊᒥᓱᐃᓕᖓᔪᓂᒃ-ᐱᓇᓱᖓᖃᕐᕕᐅᔪᑦ ᑲᑎᖕᖓᔨᖏᓐᓂᒃ ᐃᓕᖓᑎᓪᓗᒋᑦ ᖃᐅᔨᓴᕐᓂᓂᒃ ᕿᒥᕐᕈᔭᖃᕐᓂᓄᑦ ᐊᒻᒪᓗ ᑲᒪᒋᔭᐅᓯᒪᑦᓯᖏᓐᓂᖏᓐᓄᑦ; ᐱᓇᓱᑦᑎᓯᒍᑎᐅᓗᓂ ᓄᓇᕕᐅᑉ ᓄᓇᓕᖏᓐᓂᒃ ᐊᒻᒪᓗ ᐱᓇᓱᒐᖃᕐᕕᖁᑎᖏᓐᓂᒃ ᑖᒃᑯᐊᖑᓗᑎᒃ ᓇᓗᓀᕆᖃᑦᑕᓂᐊᕐᑎᓗᒋᑦ ᖃᐅᔨᓴᕐᓂᑎᒍᑦ ᓯᕗᓪᓕᐅᔭᐅᒋᐊᓕᓐᓂᒃ ᑭᖕᖒᒪᑦᓯᒍᑎᐅᔪᓂᓪᓗ; ᐊᒻᒪᓗ ᑐᓴᐅᒪᑎᑦᓯᖃᑦᑕᓗᑎᒃ ᐊᑕᓐᓂᐅᕕᒻᒥᒃ ᓄᓇᕕᒻᒥ ᓄᓇᕕᐅᓪᓗ ᓯᓚᑖᓂ. ᑌᒪᓕ ᑖᓐᓇ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᕐᓂᒥᒃ ᐱᓇᓱᓐᓂᐅᓚᐅᕐᑐᖅ ᐱᑕᖃᓪᓚᕆᒋᐊᖃᓚᐅᕐᖁᖅ ᑲᔪᓯᓂᖃᑦᓯᐊᓚᖓᑐᐊᕐᐸᑦ ᐊᑕᓐᓂᐅᕕᒃ, ᑮᓇᐅᔭᕐᑐᕈᑕᐅᓂᖃᕐᓗᓂ ᓄᓇᕕᒻᒥ ᐱᓇᓱᑦᑎᑕᕋᓱᓐᓂᓄᑦ ᑲᒪᒋᔭᖃᕐᓂᐊᓗᑎᒃ ᖃᐅᔨᓴᕐᓂᓂᒃ ᐊᑯᓃᕐᑐᒥᒃ ᐱᕙᓪᓕᖁᑎᑦᓴᐅᓗᑎᒃ ᐃᓘᓐᓇᖏᓐᓄᑦ ᓄᓇᕕᒻᒥ ᐃᓅᑦᔪᓯᖃᑎᒌᑦᑐᓄᑦ.
ᐊᑕᓐᓂᐅᕕᒃ ᑎᒃᑯᐊᑕᐅᓂᖃᓚᐅᔪᕗᖅ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᕋᓱᖁᔭᐅᑦᓱᓂ ᓖᓴ ᖁᐱᕐᕈᐊᓗᖕᒧᑦ, ᑲᓇᑕᒥᐅᑦ ᐃᓄᑐᐃᓐᓀᑦ ᓄᓇᓕᕐᔪᐊᖃᖃᑎᒌᑦᑐᑦ ᑲᑎᖕᖓᔨᖏᑕ ᐊᖓᔪᕐᖄᒪᕆᖓᓄᑦ.
ᓯᑕᒪᐅᔪᖕᖏᒐᕐᑐᑦ ᓄᓇᕕᒻᒥ ᐱᓇᓱᖃᑎᒌᒍᑎᖃᓱᖑᑦᓱᑎᒃ ᐱᓇᓱᒐᖃᕐᕕᖁᑎᐅᔪᑦ ᐱᑕᖃᕐᑎᓯᓚᖓᕗᑦ ᑮᓇᐅᔭᕐᑐᕈᑎᑦᓴᓂᒃ ᐅᕝᕙᓘᓐᓃᑦ ᐱᑕᖃᕐᑎᓯᒍᑎᖃᕐᓗᑎᒃ ᓴᐳᒻᒥᓂᕐᒥᒃ ᑲᑎᓕᕈᑎᒃ ᑮᓇᐅᔦᑦ ᐅᓄᕐᓂᖃᕐᓂᐊᑎᓪᓗᒋᑦ $500,000-ᓂᒃ ᐅᓄᕐᓂᐅᔪᑦ ᐱᓗᒋᑦ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᕐᑎᓯᒍᑎᓂᑦ, ᐅᑯᓇᖕᖓᑦ ᐊᕙᑕᖅ ᐱᐅᓯᑐᖃᓕᕆᕕᒻᒥᑦ, ᖃᑎᕕᒃ ᐃᓕᓴᕐᓂᓕᕆᓂᕐᒥᒃ, ᑲᑎᕕᒃ ᓄᓇᓕᓕᒫᑦ ᐃᒡᓗᓕᕆᓂᕐᓄᑦ ᐊᒡᓚᕕᖕᒥᑦ. ᑲᑎᕕᒃ ᓄᓇᓕᓕᒫᑦ ᑲᕙᒪᒥᑦ, ᒪᑭᕝᕕᒥᑦ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓂᑦ ᐊᒻᒪᓗ ᓄᓇᕕᒻᒥ ᐋᓐᓂᐊᓂᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ. ᐊᒻᒪᓗᒋᐊᓪᓚᒃ ᐅᑯᐊ ᓯᕿᓂᕐᒥᐅᑦ ᐱᓇᓱᒐᖃᕐᕕᖁᑎᖏᑦ the Echo Foundation, the Gordon Foundation ᐊᒻᒪᓗ the Fonds de recherche du Québec ᐅᖃᕐᓯᒪᒋᕗᑦ ᑮᓇᐅᔭᑎᒍᑦ ᓴᐳᑦᔨᓯᒪᓛᕐᓂᕋᕐᓱᑎᒃ ᐊᑕᓐᓂᐅᕕᐅᑉ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓴᓚᖃᐅᑎᑖᕋᓱᓐᓂᒥᒃ ᐱᓇᓱᒍᑎᖏᓐᓂᒃ.
ᐅᖃᐅᓯᕆᔭᐅᔪᕕᓃᑦ:
“ᐅᑉᐱᕆᔭᖃᕐᐳᒍᑦ ᑖᒃᑯᐊ ᐃᓱᒪᑖᖑᓯᒪᑦᓱᑎᒃ ᐱᓇᓱᑦᑕᐅᔪᑦ ᐊᑐᑎᖃᑦᓯᐊᑐᐃᓐᓇᔭᖏᓪᓚᑦ, ᑭᓯᐊᓂᓕ ᐱᑕᖃᕆᐊᖃᓪᓚᕆᑉᐳᑦ, ᓄᓇᕕᒻᒥ ᐃᑉᐱᓇᓪᓚᕆᑦᑐᒥᒃ ᐊᒻᒪᓗ ᑕᑯᑦᓴᐅᔪᒥᒃ ᓱᕐᕃᓂᖃᕐᓂᐊᓱᓂ ᑐᕌᕐᕕᒥᓂᒃ ᓄᓇᓕᓐᓂᒃ ᐊᒻᒪᓗ ᐅᓄᕐᓂᓴᓂᒃ ᐅᑭᐅᕐᑕᑐᒥ ᖃᐅᔨᓴᕐᓂᓂᒃ ᐱᔭᖃᕋᓱᒍᑎᖃᓲᓂᒃ.” ᐅᖃᕐᑐᖅ ᓖᓴ ᖁᐱᕐᕈᐊᓗᒃ, ᐊᖓᔪᕐᖃᒪᕆᒋᔭᐅᔪᖅ ᑲᓇᑕᒥᐅᑦ ᐃᓄᑐᐃᓐᓀᑦ ᓄᓇᓕᕐᔪᐊᖃᖃᑎᒌᑦᑐᑦ ᑲᑎᖕᖓᔨᕐᔪᐊᖏᓐᓄᑦ, ᐊᑕᓐᓂᐅᕕᒻᒥᒃ ᑎᒃᑯᐊᓯᓚᐅᔪᔪᖅ ᐅᑭᐅᕐᑕᑐᒥ ᑲᔪᖏᕐᓭᓂᕐᓄᑦ ᓵᓚᖃᐅᑎᑖᕋᓱᖁᔨᑦᓱᓂ.
“ᓄᓇᕕᒻᒥ ᐱᓇᓱᑦᑎᓴᓂᒃ ᐊᒥᓱᖕᖑᐃᒐᓱᓐᓂᖅ ᐃᓕᖓᔪᓂᒃ ᓇᒻᒥᓂᖅ-ᑐᑭᑖᕆᖃᑦᑕᓂᑦᓴᒧᑦ ᖃᐅᔨᓴᕐᓂᓂᒃ ᐱᑕᖃᓪᓚᕆᒋᐊᖃᕐᐳᖅ ᐱᔪᓐᓇᕈᑎᐅᓂᐊᕐᓗᓂ ᐃᑉᐱᓇᓪᓚᕆᑦᑐᒥᒃ ᐊᓯᑦᔨᓂᖃᕐᓂᓴᖓᓄᑦ ᖃᐅᔨᓴᕐᓂᐅᑉ ᖃᓄᐃᓘᕐᑕᐅᒍᑎᒋᓲᖏᑦᑕ ᑲᒪᒋᔭᐅᓂᕐᒥᒍᑦ ᓄᓇᕕᒻᒥ ᑌᒣᓕᖓᓕᕈᑎᒃ ᓱᓕᑦᓯᐊᑐᒥᒃ ᐱᑦᔪᔨᒍᑎᐅᕙᓐᓂᐊᓗᓂ ᓄᓇᕕᒻᒥᐅᑦ ᖃᓄᐃᖕᖏᓯᐊᕐᓂᕆᒋᐊᓕᖏᓐᓄᑦ. ᑭᖕᖒᒪᒋᔭᐅᒻᒪᕆᑦᑐᖅ ᐊᒻᒪᓗ ᓴᐳᑦᔭᐅᒪᑦᓱᓂ ᓄᓇᓕᓕᒫᓄᑦ ᐊᖏᖃᑎᒌᒍᑕᐅᑦᓱᓂ ᓄᑭᖃᑦᓯᐊᖃᑕᐅᒻᒥᔪᑦ.” ᐅᖃᕐᑐᖅ ᐋᑕᒥ ᑎᓪᓖᓪ-ᐊᓚᑯ ᒪᑭᕝᕕᐅᑉ ᐳᕐᑐᓂᕐᓴᓂ ᐊᖓᔪᕐᖄᒪᕆᐅᑉ ᑐᖓᓕᖓ, ᐊᕙᑎᓕᕆᓂᕐᓄᓗ ᐆᒪᔪᓕᕆᓂᕐᓄᓗ ᐊᒻᒪᓗ ᖃᐅᔨᓴᕐᓂᓂᒃ ᐱᑦᔪᔨᕕᖓᓂ
“ᑲᑎᕕ ᓄᓇᓕᓕᒫᑦ ᑲᕙᒪᖓ ᐅᑉᐱᕆᔭᖃᓪᓚᕆᒻᒥᔪᖅ ᐊᑕᓐᓂᐅᕕᒃ ᐱᒍᓐᓇᕈᑎᐅᓚᖓᒋᐊᖓ ᓄᓇᕕᐅᑉ ᐱᐅᓂᕐᓴᑎᒍᑦ ᐱᕙᓪᓕᐊᑎᑕᐅᓂᖓᓄᑦ, ᐊᒥᕐᖃᖃᑎᖃᖃᑦᑕᓗᓂ ᐊᒻᒪᓗ ᑲᒪᒋᔭᖃᕐᓗᓂ ᑕᕐᕋᒥ ᖃᐅᔨᓴᕈᑎᓂᒃ ᐱᓂᐊᕈᑎᖏᑦ ᓲᓱᒋᔭᖃᑦᓯᐊᑎᓪᓗᒋᑦ ᐃᓄᑐᐃᓐᓀᑦ ᐃᓪᓕᓇᕐᑐᖁᑎᖏᓐᓂᓗ ᓯᕗᓪᓕᐅᔨᒍᒪᖏᓐᓂᒃ, ᓄᓇᓕᐅᔪᓪᓗ ᐊᒻᒪᓗ ᓄᓇᓕᓕᒫᑦ ᐱᓇᓱᒐᖃᕐᕕᖏᑕ ᑎᓕᔭᐅᒪᒍᑎᖏᑎᒍᑦ. ᐅᑉᐱᕆᔭᖃᕐᐳᒍᑦ ᑖᓐᓇ ᑲᔪᖏᓭᓂᕐᑕᖃᕐᓱᓂ ᐱᓇᓱᑦᑕᐅᔪᑦ ᑭᖕᖒᒪᓇᕐᑐᓚᕆᐅᒋᐊᖓ ᓄᓇᕕᒻᒥ.” ᕿᐊᓪᑕ ᓯᓄᐹ, ᓯᕗᓕᕐᑎ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ
ᓵᓚᖃᐅᑎᑖᕐᓂᖅ ᐅᑭᐅᕐᑕᑐᒥ ᑲᔪᖏᕐᓭᓂᕐᒧᑦ ᓵᓚᖃᐅᑎᑕᕐᑎᓯᒍᑎᐅᓲᒥᒃ ᐊᖏᔪᐊᓗᒻᒥᒃ ᐱᔭᖃᕈᑎᒋᕙᖓ ᐊᑕᓐᓂᐅᕕᐅᑉ. ᖁᕕᐊᓱᐊᒍᑎᖃᒻᒪᕆᑉᐳᒍᑦ ᐱᑦᔪᑎᖃᕐᓱᑕ ᑖᒃᑯᓄᖓ ᐅᑭᐅᕐᑕᑐᒥ ᑲᔪᖏᕐᓭᓂᕐᒧᑦ ᓵᓚᖃᐅᑎᑖᑦᑎᓄᑦ ᐱᒍᓐᓇᑎᑕᐅᓛᓯᒐᑦᑕ ᐊᒥᓱᖕᖑᐃᒐᓱᒋᐊᒥᒃ ᐊᑕᓐᓂᐅᕕᐅᑉ ᐱᓇᓱᑦᑎᓴᖏᓐᓂᒃ. ᐱᔪᕆᒪᐅᑎᖃᕐᐳᒍᑦ ᓇᑯᕐᓴᕖᖕᖓᓱᑕᓗ ᐱᓇᓱᑦᑕᕗᑦ ᐅᑉᐱᕆᔭᐅᓂᖃᑦᓯᐊᒪᑦ ᐊᒥᓱᓄᓪᓗ ᓴᐳᒻᒥᔭᐅᑦᓯᐊᓱᓂ. – ᐋᓖᔅᓯᐊ ᐃᖃᓗᒃ, ᐱᕙᓪᓕᐊᑎᑕᐅᓂᖏᓐᓄᑦ ᑐᑭᒧᐊᑦᑎᓯᔨ, ᐊᑕᓐᓂᐅᕕᒃ
-30-
ᖃᐅᔨᒋᐊᕐᕕᓴᖅ:
Camille Fréchette/ᑲᒦᓪ ᕕᕆᓯᐊᑦ
ᐊᑕᓐᓂᐅᕕᐅᑉ ᑲᑎᖕᖓᔨᖁᑎᖏᑕ ᐊᓪᓚᑎᖓᑦ
cfrechette@makivvik.ca
info@atanniuvik.ca
